स्याङ्जा -९ कार्तिक ।
स्याङ्जाको सामाजिक रूपान्तरणको यात्रामा एउटा नाम पछिल्लो समय विशेष रूपमा चम्किँदै आएको छ खुमा अर्याल फाउण्डेशन। शिक्षा, स्वास्थ्य र रोजगारीजस्ता जनजीवनसँग प्रत्यक्ष सरोकार राख्ने क्षेत्रमा काम गर्दै आएको यो फाउण्डेशनले शनिबार सातौँ साधारण सभा तथा चाडपर्व विशेष शुभकामना आदानप्रदान कार्यक्रम सम्पन्न गर्दै नयाँ प्रतिबद्धताको सुरुवात गरेको छ।
पुतलीबजार नगरपालिका–३ गुडिखोलास्थित सहयात्री पार्टी प्यालेसमा भव्य रूपमा सम्पन्न कार्यक्रममा सहभागीहरूको उत्साह, सहयोग र आत्मीयता देखिन्थ्यो। उद्घाटनका क्रममा संस्थापक खुमा प्रसाद अर्यालको आवाज दृढ थियो- “हामी कुनै सरकार होइनौं, तर समाज सुधार्न सबैको सहकार्य आवश्यक छ।”
उनका यी शब्दहरूले सभाभरि उपस्थित व्यक्तिहरूको मन छोयो।
अर्यालले फाउण्डेशनले स्रोत व्यवस्थापन पूरा गरिसकेको बताउँदै यो वर्षदेखि स्याङ्जाका ११ वटै स्थानीय तहमा प्रतिवद्धता अनुसारका कार्य प्रारम्भ हुने स्पष्ट निर्देशन दिए। उनका अनुसार, फाउण्डेशन अब ग्रामीण भेगसम्म शिक्षा र स्वास्थ्य सेवा पु-याउने दिशामा केन्द्रित हुनेछ।
सभामा पुतलीबजार नगरपालिका प्रमुख तुलसीराम रेग्मी, उपप्रमुख देवी अर्याल, पत्रकार महासंघका पूर्व अध्यक्ष श्रीकृष्ण सिग्देल, नागरिक समाज स्याङ्जाका अध्यक्ष ओमप्रकाश शर्मा, वालिङ नगर उपप्रमुख कविता तिवारी गैरे, अर्जुनचौपारी गाउँपालिका उपाध्यक्ष सपना गुरुङ लगायतका अतिथिहरूले फाउण्डेशनको गतिविधि ‘स्याङ्जाको सामाजिक चेतना जागृत गर्ने अभियान’ भएको अभिव्यक्ति दिए।
कार्यक्रममा सहभागीहरूले फाउण्डेशनका आगामी योजना, ग्रामीण स्तरमा प्रभावकारी कार्यान्वयन र युवा सहभागिताका विषयमा सुझाव दिए। सो अवसरमा १२ वटा संस्थालाई संस्थागत आवद्धता प्रमाणपत्र प्रदान गरी सहकार्यको दायरा थप विस्तार गरिएको थियो।
फाउण्डेशनका अध्यक्ष लेखनाथ शर्माले सभाको समापन गर्दै भने,
“हाम्रो यात्रा सामाजिक परिवर्तनतर्फ हो, जहाँ शिक्षा र स्वास्थ्य हरेक घरसम्म पुग्नेछ।”
कार्यक्रम उपाध्यक्ष शालिकराम अर्यालको स्वागत मन्तव्य र सचिव ध्रुव शर्माको संयोजनमा सम्पन्न भयो। अन्त्यमा उपस्थितले दशैं, तिहार र छठ पर्वका शुभकामना साटासाट गर्दै आपसी सहकार्य र साझा उद्देश्यका लागि हातेमालो गर्ने प्रतिवद्धता व्यक्त गरेका थिए ।
