प्रदिप कोइराला / साउन १३ ।
दुध उत्पादक किसानलाई उत्पादनको आधारमा अनुदान उपलब्ध गराएपछि किसान उत्साहित भएका छन् । वालिङ नगरपालिकालाई दुधमा आत्मनिर्भर बनाउने उद्देश्यसहित पालिकाले उत्पादनका आधारमा अनुदान दिने नीति ल्याएपछि पशुपालक कृषकहरुलाई उत्साह थपिएको छ ।
उत्पादनको आधारमा कृषकको घर घरमा अनुदान पु¥याउने रणनीति अनुरुप नगरपालिकाले गत आर्थिक वर्षमा दुध उत्पादन गर्ने ४० जना कृषकलाई ७ लाख १६ हजार नौ सय दुई रुपैया नगद अनुदान उपलव्ध गराएको वालिङ नगरपालिकाले जनाएको छ ।
नगरपालिका कृषि तथा पशु शाखाको आयोजनामा आईतवार अनुदान वितरण कार्यक्रम मार्फत कृषकहरुलाई अनुदान वितरण गरिएको हो ।
गत आर्थिक वर्षमा उत्पादित दुधमा प्रतिलिटर १० का दरमा अनुदान दिइएको नगरप्रमुख कृष्ण खाँणले जानकारी दिए । गत वर्षमा उत्पादन भएको ८७ हजार २ सय ५४ लिटर उत्पादन गर्ने र सहकारी मार्फत विक्रि वितरण गरेको तथ्याङ्कलाई हेरेर अनुदान दिईएको खाँणले जानकारी दिए । पालिकाले जिल्ला भेटेरिनरी तथा पशु विज्ञ केन्द्रले दिने नगद अनुदानमा नदोहोरिने गरी अनुदान प्रदान गरेको उनको भनाई छ ।
कार्यक्रममा नगर उपप्रमुख कविता तिवारीले कृषि र पशुपालन क्षेत्रलाई अझै व्यवस्थित गर्दै लैजाने नीति लिइएको उल्लेख गरिन् । उनले भनिन्, “नगरपालिकालाई दुधमा आत्मनिर्भर बनाउन उत्पादनका आधारमा अनुदान दिने नीति ल्याएका हौँ । यसले गर्दा दुग्ध उत्पादक किसान पेसाप्रति आकर्षित र उत्साहित भएको पाएका छौँ ।”
नगरपालिकाले दुधमा मात्र नभई गाई र भैसी खरिदमा समेत अनुदानको कार्यक्रम सन्चालन गरेको जानकारी दिईन् । गत वर्ष गाई पाल्ने कृषकलाई अधिकतम ५० हजार नगद अनुदान दिएको जानकारी दिईन् । कृषि पेशावाट जिविकोपार्जन गर्न सकिन्छ भन्ने उद्देश्य साकार होस भनेर कृषक अनुदान सहायता कार्यक्रम राखेको उनको जिकिर थियो ।
वालिङ –१३ का कृषक छविलाल गैह्रेले अनुदानले आफूमा उत्साह थपिएको बताए । उनले भने, “थोरै रकम भए पनि कृषकलाई काम गर्ने प्रेरणा मिलेको छ ।” ३३ वर्षीय गैह्रेले विगत १० वर्षदेखि गाई र भैँसी पाल्दै आएका थिए । दैनिक ६० लिटर दुध बेच्ने गैह्रेले ४४ हजार २ सय २५ नगद अनुदान प्राप्त गरेका छन् ।
अनुदानमा आधारित रहेर पाउने पैसाले वास्तविक कृषकलाई फाइदा पुग्ने कृषक टीकाराम रेग्मीको बुझाइ छ । अर्यालले भने, “काम गर्नेले नपाउने तर काम नगर्नेले अनुदान पाउने रोग अन्त्य गर्न उत्पादनमा आधारित अनुदानले सहयोग गरेको छ ।”
नगरपालिकाले वालिङमा रहेको अकला नमुना साना कृषि सहकारी संस्थासँग सम्झौता गरेर दुग्ध संकलन गर्दैआएको प्रमुख प्रशासकीय अधिकृत तेजराज शर्माले जानकारी दिए । लागत कम हुने तर उत्पादन र आम्दानी धेरै हुने हुँदा पालिकाले व्यावसायिक गाई पालनतर्फ ध्यान दिएको जानकारी दिए ।
पालिकाले अनुदानमा दिएका गाईका लागि निरन्तर प्राविधिक सेवा प्रवाह गर्दैआएको पशु सेवा शाखाका डा. रोशन बस्यालले जानकारी दिए । पछिल्लो समय गाईपालन प्रति कृषक सन्तुष्ट रहेको उनको वुझाई छ । वालिङ नगरपालिका भित्र सात सय घरधुरीले गाई–भैँसी पालेर औसतमा दिनको पाँचसय लिटर दुध उत्पादन गरी बजारमा बेच्ने नगरपालिको दीर्घकालीन योजना रहेको नगरपालिकाले जनाएको छ ।
