भरतपुर-४ जेठ । स्टेप बाइ स्टेप विद्यालय भरतपुर चितवनका विद्यार्थीलाई निर्वाचन सम्वन्धी नमुना अभ्यास मार्फत विद्यार्थी नेतृत्व चयन भएका छन्। यस सिकाई अभ्यासलाई स्टेप वाई स्टेप सभा निर्वाचन २०८१ नामाकरण गरिएको थियो ।
मतदाता शिक्षा सहित निर्वाचन प्रणालीको जानकारी दिने उद्देश्यका साथ कक्षा मनिटर छात्र/छात्रा पहिलो चरणमा र हाउस क्याप्टेन भाइस क्याप्टेन दोस्रो चरणमा गरी स्टेप बाइ स्टेप इङ्लिस सेकेन्डरी स्कुलले विद्यालय सभा निर्वाचन २०८१ सम्पन्न गरेको छ ।
व्यवहारिक शुक्रबारीय कार्यक्रम अन्तर्गत सो निर्वाचन २०८१ जेठ ४ गते शुक्रबार विद्यालय परिसरमा आयोजना भएको थियो । उक्त निर्वाचनमा कक्षा २ देखि १० सम्मका १२ सय विद्यार्थीहरुको सहभागीता रहेको थियो ।
उक्त निर्वाचनको प्रमुख निर्वाचन आयुक्तमा विद्यालयका सामाजिक तथा मानव मूल्य शिक्षा विषयका विभागीय प्रमुख एवम् विद्यालयका सह–प्राचार्य युवराज गुरुङ थिए । प्रथम चरणको मतदानमा कक्षा २ देखि १० सम्म अध्यापन गराउने कक्षा शिक्षकहरु मतदान अधिकृत वनाईएको थियो । भने, दोस्रो चरणको निर्वाचनमा सम्बन्धित हाउसका हाउस फादरहरुलाई मतदान अधिकृतको जिम्मेवारी दिइएको थियो ।
शुक्रबार सम्पन्न सो पहिलो चरणको निर्वाचनबाट छात्र र छात्रा मनिटर निर्वाचित भएका थिए ।
दोस्रो चरणको हाउस अनुसारको निर्वाचन कक्षा ७ देखि १० लाई सिनियर र ४ देखि ६ लाई जुनियर समूहमा विभाजन गरी गरिएको थियो ।
प्रयोगात्मक तरिकाले विद्यार्थीहरुलाई सिकाउने उद्देश्यका साथ सो निर्वाचन कार्यक्रम आयोजना गरिएको र आगामी दिनहरुमा पनि यस्ता व्यवहारिक र उपलब्धीमूलक कार्यक्रमलाई विद्यालयले प्राथमिकतामा राखि नमुना अभ्यास गराईएको विद्यालयले जनाएको छ ।
कार्यक्रममा सभा निर्वाचनबाट निर्वाचित ३४ जना सदस्य र विभिन्न तहप्रमुख र प्रिन्सिपलको तर्फबाट १५ जना मनोनित सदस्यहरुसहित ४९ जनाको विद्यालय सभा बनाइने र उक्त सभाले समग्र विद्यालयको विद्यार्थी मनिटर चयन गर्ने जानकारी दिएको छ । यस किसिमको क्रियाकलाप नेपालको संवैधानिक प्रणालीअनुसार जुन विद्यार्थी सभाको निर्वाचन विद्यालयमा गरिएको छ यसले विद्यार्थीहरुलाई निर्वाचन प्रक्रियाका बारेमा व्यवहारिक ज्ञान प्रदान गर्न सक्ने विश्वास लिईएको छ ।
नमुना अभ्यासमा निर्वाचनमा प्रयोग हुने निर्वाचन सामाग्री समेत ल्याईएका थिए ।