स्याङ्जा-१ जेठ ।
स्याङ्जा काँग्रेसका नेता, प्रजातान्त्रिक आन्दोलनका विशिष्ट व्यक्तित्व खगेन्द्रराज रेग्मीको मंङलबार ५ बजे निधन भएको छ ।
२००५ सालमा स्याङ्जाको तत्कालीन खिलुङ गाविसको वडा २ र हाल भिरकोट नगरपालिकाका ७ मा जन्मनु भएका रेग्मी लामो समय देखि गम्भीर बिरामी भई उपचारमा हुनुहुन्थ्यो तर केही हप्ता अगाडि चिकित्सकले सुधार नहुने बताएपछि उहाँलाई आफ्नै निवास भीरकोट ल्याइएको थियो ।
स्याङ्जाको काँग्रेस संगठन मजबुत बनाउने एउटा बिशिष्ठ व्यक्तित्वको रुपमा रेग्मीलाई चिनिन्छ ।२ कार्यकाल स्याङ्जा काङ्ग्रेसको सभापति हुनुभएका रेग्मी गजेन्द्र नारायण सिंहको मृत्यु पछि राष्ट्रिय सभा सांसद समेत हुनुभएको थियोे भने कृष्ण प्रसाद भट्टराई पार्टी सभापति रहँदा नेपाली काङ्ग्रेसको केन्द्रीय कार्यलय सचिवको जिम्मेवारी समेत निर्वाह गर्नुभएको थियो ।
दिवंगत रेग्मीको पार्थिव शरिर अन्तिम श्रद्धाञ्जलीको लागि नेपाली काँग्रेस स्याङ्जाको कार्यालय परिसरमा लैजाने तयारी गरिएको छ । ११ बजे पुतलीबजार स्थित पार्टी कार्यालयमा राखिने छ भने १ बजे रामनधी धाम राम्दीसम्म शव यात्रा हुने नेपाली काँग्रेस स्याङ्जाले जनाएको छ ।
