वालिङ नगरपालिकाले आर्थिक वर्ष ०८०÷८१ का लागि १ अर्ब बढीको बजेट प्रस्तुत गरेको छ । नगरपालिको १४ औँ नगरसभामा नगर उपप्रमुख कविता तिवारी गैह्रेले प्रस्तुत गरेको बजेट एक अर्व ८ करोड ८९ लाख ८३ हजार रुपैंया रहने अनुमान गरिएको छ ।
उपप्रमुखले तिवारीद्वारा प्रस्तुत बजेटमा चालुतर्फ ६० करोड ५६ लाख ७१ हजार अर्थात ५६. १३ प्रतिशत र पुँजीगततर्फ ४७ करोड ३३ लख ५१ हजार ४३. ८७ प्रतिशत रहेको छ । विनियोजित बजेटमा आर्थिक विकासका लागि ११ करोड ४० लाख ३३ हजार एक सय ५०, सामाजिक विकासमा छ करोड ५१ लाख ६१ हजार, पूर्वाधार विकासमा नौ करोड ७७ लाख ८००, सुशासन र अन्र्तसम्बन्धतर्फ तिन करोड ५५ हजार नौ सय अनुमान गरिएको छ ।
अनुमानित बजेटको स्रोत व्यवस्थापनको लागि आर्थिक विकासको लागि आन्तरिक स्रोत वृद्धिलाई मुख्यरुपमा लिइएको छ । आन्तरिक आयस्रोत वृद्धि गरी ३१ करोड पु¥याइने लक्ष्य लिइएको छ । संघीय वित्तीय समानीकरणबाट १४ करोड ९६ लाख, संघीय सरकार राजस्व बाँडफाँड १३ करोड २२ लाख ४६ हजार, संघीय सरकार सशर्त अनुदान ४१ करोड ४४ लाख प्रक्ष्येपण गरिएको छ ।
संघिय सरकार विशेष अनुदान एक करोड ५० लाख, संघीय सरकार समपुरक अनुदान तिन करोड, प्रदेश सरकार समानीकरण अनुदान दुई करोड ११ लाख ४९ हजार, प्रदेश सरकार राजस्व बाँडफाँड एक करोड ५५ लाख ८८ हजार, प्रदेश सरकार ससर्त अनुदान ५० लाख र प्रदेश सरकार समपुरक अनुदान ६० लाख अनुमान गरिएको छ ।
विनियोजित बजेटबाट नगरपालिकाका १४ वटा वडाहरुमा छ करोड ५० लाख छुट्याइएको छ । वडाहरुमा पठाइने बजेट संघीय सरकारबाट प्राप्त समानीकरण अनुदानको स्रोत रहने छ ।
आर्थिक वर्ष २०८०/८१ को बजेट तर्जुमा गर्दा वार्षिक नीति तथा कार्यक्रम, संघ र प्रदेशबाट प्राप्त भएका मार्गदर्शन तथा बजेट सीमा, नेपाल सरकार, स्थानीय सरकार सञ्चालन ऐन, दिगो विकास लक्ष्य, आवधिक योजना लगायतलाई मुख्य मार्गदर्शनका रुपमा लिएको उल्लेख छ ।
यस्तै, बजेट तर्जुमा गर्दा विभिन्न राजनीतिक दलहरुबाट प्राप्त सुझाव, व्यावसायिक, सामाजिक संघसंस्था, राजस्व परामर्श समिति, स्रोत अनुमान तथा सीमा निर्धारण समिति, वडा भेला, टोल विकास संस्था, नागरिक अगुवा, करदाता, जनप्रतिनिधिबाट प्राप्त सल्लाह, सुझाव एवम् निर्देशनलाई आधार बनाइएको उपप्रमुख तिवारीले बताइन् ।
