२० माघ,स्याङ्जा – महिला राष्ट्रिय लिगमा वालिङ नगरपालिका स्याङ्जाले दोस्रो जित हात पारेको छ।
वालिङले मंगलबार एन्फा कम्प्लेक्स सातदोबाटोमा भएको खेलमा चन्द्रपुर नगरपालिका रौतहटलाई ३-० गोलले पराजित गर्यो।
वालिङका लागि दुई क्यामरुनी खेलाडीले गोल गरे।
खेलको ३७ मिनेटमा नोइलीको गोलबाट वालिङले अग्रता लियो।
त्यसपछि थप दुई गोल मेथो रुथले गरिन्। उनले खेलको ४५ र ५३ मिनेटमा गरी दुई गोल गरेकी हुन्।
जारी प्रतियोगितामा वालिङ ६ खेलमा २ जित र २ बराबरी खेल्दै ८ अंक जोडेर चौथो स्थानमा छ।
शीर्ष स्थानको नेपाल एपिएफ क्लबको ६ खेलबाट १८ अंक छ।
पाँच खेलबाट १० अंक जोडेको त्रिभुवन आर्मी क्लब दोस्रो र छ खेलबाट ८ अंक जोडेको नेपाल पुलिस क्लब तेस्रो स्थानमा छ।
पाँचौ स्थानको विराटनगरले पाँच खेलबाट ७ अंक जोडेको छ भने चन्द्रपुर ६ खेलबाट ३ अंक जोडेर छैटौं स्थानमा छ। पुछारको चौदण्डीगढीले पाँचै खेलमा हार बेहोरेको छ।
