तोलाकान्त बगाले
वालिङ, २४ चैत । वालिङ नगरपालिकाले दैनिक उपभोग्य बस्तुको दरभाउ निर्धारण गरेको छ ।
कोरोना भाईरस (कोभिड १९) संक्रमण हुन नदिन गरिएको लकडाउनको समयमा वालिङ नगरभित्रका खाद्यान्न पसलहरुमा दैनिक उपभोग्य बस्तुको दरभाउमा एकरुपता ल्याउने उद्देश्यले वालिङ नगरपालिकाको पहलमा वालिङ उद्योग वाणिज्य संघ र ब्यावसायीहरुको संयुक्त बैठकले खाद्यान्नको दरभाउ निर्धारण गरेको वालिङ नगर पालिकाले जनाएको छ ।
वालिङ नगरभित्रका १४ वटै वडामा कोभिड १९ को संक्रमणबाट गुज्रिरहेको अवस्थामा नगरपालिकाका प्रभावित नागरिकहरु सिमान्तकृत, अतिविपन्न, दैनिक ज्यालादारी, गुजारा ब्यवसाय र सडक जीवन बिताईरहेकाहरुलाई खाद्यान्न तथा राहत एउटै दरभाउमा उपलब्ध गराउन सकियोस् भनेर सामूहिक छलफलबाट दरभाउ निर्धारण गरिएको नगर प्रमुख दिलिप प्रताप खाँणले बताए ।
कोरोना संक्रमणको असहज परिस्थितिमा दैनिक उपभोग्य बस्तुको सहज आपूर्तिको ब्यवस्था मिलाइहेका छौं” नगर प्रमुख खाँणले भने, “दैनिक अत्यावश्यक वस्तुको कालोबजारी, अनुचित मूल्य बृद्धि, मिसावट तथा गुणस्तरहिन मालसामन बिक्री वितरण गर्ने कार्यलाई निरुत्साहित गरिने छ ।”
संयुक्त बैठकले चामल सामा राम्रो प्रतिकेजी रु. ५५, अडहर दाल प्रतिकेजी रु. एकसय ४०, मुसुरो दाल प्रतिकेजी एकसय १०, भट्टमास तेल प्रतिलिटर रु एकसय ५०, आयो नुन प्रतिकेजी रु. २१ र साबुन लाईफबाँय प्रतिगोटा रु. ३० निर्धारण गरिएको हो ।
दैनिक उपभोग्य बस्तुको खरिद बिक्रीका समयमा तोकिएको मूल्यसूचि अनुसार विक्रि वितरण गर्ने पनि निर्णय गरेको छ ।
