स्याङ्जा, १६ चैत – वालिङ नगरपालिका–१, स्थाई वासिन्दा समाजसेवी कृष्ण खाँणले सरकारले कोरोना संक्रमण नियन्त्रणमा थालेको कदमलाई सहयोग गर्न जिल्ला प्रशासन कार्यालयलाई आफूले प्रयोग गर्दै आएको दुईवटा निजी सवारी साधन दिने घोषणा गरेका छन् ।
उनले बा १७ प ८११६ नम्बरको स्कारपियो र लु ५६ प ३१२१ नम्बरको मोटरसाइकल निशुल्क प्रयोग गर्न दिने घोषणा गरेका हुन् । कोरोना भाइरसको संक्रमणको रोकथामको लागि साधन कमी नहोस् भनेर आफूसँग भएका दुईवटा सवारी साधन जिल्ला प्रशासन अथवा वडा प्रहरी कार्यालय वालिङमा जहाँ आवश्यक्ता पर्छ त्यही राखेर प्रयोग गर्न प्रमुख जिल्ला अधिकारी रामबहादुर कुरुम्बाङ्गलाई भनेको उनले बताए । ‘देश संकटमा परेको बेला आफूसाँ भएको साधन सहयोग गरेको हँु’, उनले भने,‘ संक्रमणलाई फैलिन नदिएर अहिलेको संकटबाट देश र जनतालाई जोगाउनु नै अहिलेको मुख्य काम हो ।’ उनी नेकपाका नेता पनि हुन् ।
खाँणले आफ्नै भाई किरण खाँणको छोरा विद्यान खाँणको पाँचौ वर्ष प्रवेश गरेको जन्मदिनको अवसरलाई पनि कोरोना संक्रमण नियन्त्रणका लागि बालगृह, सुरक्षाकर्मी, स्वास्थ्यकर्मी र पत्रकारलाई मास्क, सेनीटाईजर, पञ्जा वितरण गरेका छन् ।
आँधीखोला गाँउपालिकामा अवस्थित अमोर बालगृहमा खाँण आफै पुगेर बालगृह सन्चालक कमला पराजुलीलाई मास्क, पंजा र सेनीटाईजर हस्तान्तरण गरेका छन् , भने वालिङ नगरपालिका प्रमुख दिलिप प्रताप खाँण मार्फत स्वास्थ्य संस्थामा कार्यरत स्वास्थ्यकर्मीलाई, वडा प्रहरी कार्यालयका प्रमुख निरञ्जन घिमिरे र शसस्त्र प्रहरीका प्रहरी नायव उपरिक्षक राजेश खरेल मार्फत सुरक्षाकर्मी र पत्रकारहरुलाई उक्त सामाग्री हस्तान्तरण गरेका छन् ।
स्वास्थ्यकर्मी देवेन्द्र भट्टराई,निर्माण व्यवसायी विक्रम खाँणले पनि सहयोगको घोषणा
यसैगरि गह्रौ अस्पताल वालिङमा कार्यरत सिनियर अहेव देवेन्द्र भट्टराईले पनि आफ्नो एकमहिना बराबरको तलब कोरोना भाइरस जोखिम नियन्त्रणका लागि सहयोग गर्ने घोषणा गरेका छन् । भट्टराईले फेसबुकमा एक स्टाटस लेख्दै आफ्नो एक महिनाको तलब बराबरको रकम कोरोना जोखिम सामना कोषमा जम्मा गर्ने घोषणा गरेका हुन् ।
उता वालिङ १ रामवाच्छाका युवा निर्माण व्यवसायी विक्रम खाँणले पनि फेसवुकमा स्टाटस लेख्ने आफू चढने इसुजु पिक अप ग २ च २६५६ नंवरको निजि कार कोरोना भाईरस नियन्त्रणका लागि जिल्ला प्रशासन कार्यालय र वडा प्रहरी कार्यालयको समन्वयमा सन्चालन गर्ने गरी निशुल्क प्रदान गर्ने घोषणा गरेका छन् ।
