वालिङ, १९ पौष ।
खरका छाना भएका नागरिकका खरका छाना बिस्थापित गर्ने अभियान अन्तरगत स्याङ्जामा सुरक्षित नागरिक आवास कार्यक्रम शुरु भएको छ । जिल्लाका वालिङ, गल्याङ, चापाकोट, भीरकोट नगरपालिका र कालीगण्डकी गाउँपालिका गरी ५ पालिकाका २ सय ५० खरका छाना भएका घरलाई टिनको छानो लगाउने अभियान शुरु भएको हो ।
अभियानको शनिवार नेपाल सरकारका भुमि व्यवस्था सहकारी तथा गरिवि निवारण मन्त्री पद्मा अर्यालले शुरु गरेकी हुन् । सुरक्षित जनता आवास कार्यक्रमको अध्यक्ष सम्बन्धीत निर्वाचन क्षेत्रको सांसद रहने प्राबधान अन्गरगत मन्त्री अर्यालले आफ्नो निर्वाचन क्षेत्रमा टिनका छाना लगाउने अभियानको थालनी गरेकी हुन् ।
खरका छाना भएकाहरुको परिवारलाई चेक हस्तान्तरण गर्दै मन्त्री अर्यालले सुरक्षित जनता आवास निर्माणका लागि सरकार देशभरका खरका छाना विस्थापित गर्ने अभियानमा लागि परेको जानकारी दिइन् । सन् २०३० सम्म नेपालमा गरिवि निर्मुल पार्ने लक्ष्य सरकारको रहेको भन्दै मन्त्री अर्यालले यो संवृद्धिको लागि सरकारको नयाँ अभियान भएको स्पष्ट पारिन् ।
स्याङ्जा निर्वाचन क्षेत्र नं २ का पाँच पालिकामा यसवर्ष २ सय ५० परिवारलाई ५० हजारका दरले रकम उपलव्ध गराईने छ । पहिलो किस्ता अन्तरगत रु ३० हजार उपलव्ध गराइएको हो । बाँकी रहेका खरका छानाको लगत संकलन गरी पुन यसरी नै खरका छाना हटाईने मन्त्री अर्यालले जानकारी दिइन्।वालिङमा भएको कार्यक्रममा ५० जनालाई पहिलो किस्ता अन्तरगत रु ८ लाख ४० हजार हस्तान्तरण गरिएको छ । भने गल्याङ नगरपालिकामा भएको कार्यक्रममा पनि मन्त्री अर्यालले ५० परिवारलाई पहिलो किस्ता बापतको रकम उपलव्ध गराइएको जनाएको छ ।
