स्याङ्जा—२६ भदौ
वडा प्रहरी कार्यालय वालिङले ठुलो परिमाणमा घरेलु मदिरा नियन्त्रणमा लिई नष्ट गरेको छ । अबैध रुपले उत्पादन गरि विक्री वितरण गरेको सूचनाका आधारमा घरेलु मदिरा नियन्त्रणमा लिएर नष्ट गरिएको वडा प्रहरी कार्यालय वालिङले जनाएको छ ।
घरेलु मदिराका कारण समाजमा फैलिएको विकृति विसंगतीले शान्ति सुरक्षामा चुनौती थपिदै गएको तथ्याङ्को आधारमा प्रहरीले घरेलु मदिरा नष्ट गर्ने अभियान जिल्लाभरी संचालन गरेको छ । वालिङ नगरपालिकालाई अबैध मदिरा उत्पादन र विक्रिमा रोक लगाउदै शान्ति सुरक्षालाई अव्बल बनाउने अभियान प्रहरीको छ ।
वडा प्रहरी कार्यालयका प्रमुख प्रहरी निरिक्षक निरन्जन घिमिरेको कमाण्डमा खटेको टोलीले एकै दिन ६ हजार मदिरा बनाउन प्रयोग गर्ने कच्चा पदार्थ सहित उत्पादित मदिरा नियन्त्रणमा लिएको थियो ।
यो अभियानलाई प्रहरीले निरन्तरता दिने समेत जनाएको छ । चाडवार्ड नजिकिदै गर्दा कुनै अपराधिक क्रियाकलाप घट्नबाट जोगाउन हामीले पहिलो चरण अबैध रुपले उत्पादन गरेको घरेलु मदिरा विक्रि र उत्पादनलाई रोक लगाउने अभियान शुरु गरेको प्रहरी निरिक्षक निरन्जन घिमिरेको भनाई छ । बिशेष कार्ययोजना बनाएर यसको निरन्तरता दिने अभियानमा छौं प्रहरी निरिक्षक घिमिरेले भने, “पहिलो चरण सचेत, दोस्रो चरण सम्झाउने र तेस्रो चरण सम्म पनि भेट्टिएमा कारवाहि पक्रिया थाल्ने छौं ।” यस अभियानमा सबै नागरिकको साथ सहयोग हुने अपेक्षा हाम्रो छ उनले भने ।
समुदाय—प्रहरी साझेदारी कार्यक्रम मार्फत समाजलाई शान्ति सुरक्षाको अनुभुती दिलाउने अभियान शुरु गरेको नेपाल प्रहरीले समाजलाई अशान्ति मच्चाउने पहिलो कारण घरेलु मदिरा रहेको जनाउदै आएको थियो । वडा प्रहरी कार्यालय वालिङले भुम्रे, भकुण्डे, तल्लो वालिङ, रामबाच्छाबाट घरेलु मदिरा नियन्त्रणमा लिएको जनाएको छ । अखाद्य बस्तु मिसाएर उत्पादन गरिएको घरेलु मदिराले शान्ति सुरक्षा मात्रै नभएर नागरिकको स्वास्थ्यमा समेत गम्भिर असर पर्ने भएकाले यो अभियान शुरु गरेको जिल्ला प्रहरी कार्यालय स्याङ्जाका प्रमुख राजकुमार लम्सालले बताए ।
जिल्ला प्रहरी कार्यालय स्याङजाको मातहतमा रहेका प्रत्येक प्रहरी इकाईहरुलाई घरेलु मदिरा नियन्त्रणमा लिन निर्देशन दिएको प्रहरी उपरिक्षक लम्सालले बताए । अहिले सम्म जिल्ला भरी गरेर प्रहरीले करिव ६५ हजार लिटर घरेलु मदिरा नष्ट गरेको जिल्ला प्रहरी कार्यालय स्याङ्जाले जनाएको छ । प्रहरीले घरेलु मदिार उत्पादन गर्न प्रयोग हुने भाँडाँकुडा, मर्चा लगायतका सामाग्री बरामद समेत गरेको छ । प्रहरीले थालेको यो अभियानलाई स्थानीयले राम्रो माने पनि व्यवसायीले भने यस कार्यमा असन्तुष्ट व्यक्त गरेका छन् ।
