चितवन, ९ भदौ । नेपाली कांग्रेसका वरिष्ठ नेता रामचन्द्र पौडेलले वर्तमान सरकारप्रति जनताको विश्वास गुमेको वताएका छन् । चितवनमा आज पत्रकारसँगको कुराकानीमा नेता पौडेलले जनअपेक्षा विपरित सरकार गएकाले प्रमुख प्रतिपक्ष नेपाली काँग्रेसले जनताको मन जित्नेगरी काम गर्नुपर्ने बताएका हुन् ।
‘सरकारको विकल्पको रुपमा काङ्ग्रेसलाई तयार गर्नुपर्छ’, नेता पौडेलले भने ‘यसका लागि सबै एक भएर अघि बढ्नुको विकल्प छैन ।’ पार्टीको महाधिवेशन समयमा नै गर्नुपर्ने र पार्टीभित्र भएका कमी कमजोरीलाई अन्त्य गर्दै जनतामाझ जानुको विकल्प नरहेको उनको भनाइ थियो । राजनीतिमा सबै कुरा सबैले एकैनास बोल्छ भन्ने हुँदैन पक्ष–विपक्ष हुन्छ तर जनताको काम गर्ने समयमा त्यो देखिनु नहुने नेता पौडेलको भनाई थियो ।
फरक प्रसंगमा उनले सरकार र यहाँको न्याय प्रणालीप्रति जनतामा अविश्वास बढ्दै गएको बताए । कार्यक्रम प्रस्तोता रवि लामिछानेको समर्थनमा उत्रिएका जनताले यसलाई प्रमाणित गरेको नेता पौडेलको भनाइ थियो । मिछानेसहितका तीन आरोपित व्यक्तिका सम्बन्धमा न्यायोचित छानबिन हुनुपर्नेमा जोड दिँदै उनले यो विषय न्यायालयमा पुगिसेकाले न्यायोचित छानबिन हुने अपेक्षा गरे ।
