हिमदुत सम्वाददाता
वालिङ–२६, साउन
वालिङ नगरपालिका न्यायिक समितीका संयोजक तथा उप प्रमुख कल्पना तिवारीले स्थानीय सरकारका तिनवटा अंग कार्यपालिका, न्यायपालिका र व्यवस्थापिकाको कार्य सम्पादन प्रभावकारी ढंगले सन्चालन गरे मात्र नागरीकले स्थानीय सरकारवाट सुशासनको प्रत्याभूति प्राप्त गर्न सक्ने वताएकी छन् ।
वालिङ नगरपालिकामा आज आयोजित प्राकृतिक स्रोत द्वन्द रुपान्तरण केन्द्रले आयोजना गरेको सामुदायिक मेलमिलाप सेवावारे अभिमुखिकरण कार्यक्रममा वोल्दै तिवारीले वालिङ नगरपालिकामा न्यायिक समितीले मेलमिलापकै आधारवाटनै धेरै मुद्दा किनारा लगाएको जानकारी गराएकी थिइन । स्थानीय सरकार सन्चालन ऐनको दफा ४७ को धारा १ र २ ले व्यवस्था गरे अनुरुप न्याय सम्पादन गरिरहेका वताउदै उपप्रमुख तिवारीले न्याय दिलाउनु भन्दा नागरिकले न्याय पाइयो भन्ने महशुस भयो भने मात्र सहि न्याय सम्पादन हुने हुँदा वालिङ नगरपालिकाले पनि सोही अनुरुप बिवाद समाधान गर्न प्रतिवद्ध रहेको वताइन ।
प्राकृतिक न्यायको सिद्धान्तलाई अंगिकार गर्दै विवाद समाधानमा कसैले जितेको र कसैले हारेको भन्ने महशुस हुन नदिइ वालिङ नगरपालिकाले दुवै पक्षको जित महशुस हुनेगरी न्याय सम्पादन गरेको जानकारी दिइन ।
अभिमुखिकरण कार्यक्रममा वालिङ नगरपालिकाका प्रवक्ता केदार काफ्ले, वालिङ नगरपालिकाका प्रशासकीय अधिकृत गुरुदत्त सुवेदी लगायतले वोलेका थिए । उनीहरुले न्यायिक समिती र सामुदायिक मेलमिलापको भूमिका प्रभावकारी वन्दै गइरहेको वताएका थिए । साना तिना द्वन्द समाधान वडावाट मेलमिलाप कर्ताहरुवाट हुने गरिएको हुँदा मेलमिलापको माध्यम प्रभावकारी भएको उल्लेख गरेका थिए ।
द एसिया फाउण्डेशनले स्थानीय सरकार सवलीकरणमा गरेको सहयोग अन्तरगत प्राकृतिक स्रोत द्वन्द रुपान्तरण केन्द नेपालले सोमवारवाट वालिङ नगरपालिकाका सबै वडाहरुमा मेलमिलाप सम्वन्धी तालिम प्रदान गर्ने कार्यक्रम समेत आयोजना गरिएको वालिङ नगरपालिकाले जनाएको छ । प्रत्येक वाडका ३० जनालाई मेलमिलाप सम्वन्धी तालिम दिने वालिङ नगरपालिकाले जनाएको छ । कार्यक्रममा केन्द्रका कार्यकारी निर्देशक चुपवहादुर थापाले सहजीकरण गरेका थिए ।
